गमछा फिर कामे आइ गवा…
1 min read
गमछा तोहार गुन ऊ जानै,
जे सब दिन तुहका साथ लेहे,
हरदम ओहके कामे आवा,
हर हारे गाढे साथ देहे…
गर्मी मा तुहका मूढे बाँधे,
औ देहीं कै पसीना पोंछ लेहे
तू राजमुकुट गरीबन कै,
औ खुद का राजा सोंच लेहे…
भागवत कै निशान गमछा,
कार्यकर्तन कै पहचान गमछा,
लाई चबैना बाँधि लेय,
चलती फिरती दुकान गमछा…
जब चाहिन तुहका ओढ़ लिहिन,
औ जरूरत परे बिछाय लिहिन,
जौ फंसिन कबौ हौके मौके,
तोहरे भरोसे नहाय लिहिन…
परसिन उघार होय जब पूड़ी,
करिहांई तुहैं लपेट लिहिन,
मिली बरात रजाई गंधउरी,
तौ अंदर तुहका जेट लिहिन…
निकसिन बजार लेवय सब्जी,
पर घरहीं झोरा भूलि गइन,
गठरी तैयार भै गमछा कै,
गाड़ी मा पीछे झूलि गइन…
लौटत की घरे ठण्डी मा कुछ,
हल्का सा कान जडाइ गवा,
झट से लपेट लेहे काने मा,
गमछा फिर कामे आइ गवा…
खेती बाड़ी मा जुटा अही,
मूढे पै फेंटा बाँधे,
फिर एक बार बनिगा रक्षक,
कल तक जोन रहा काँधे…
काँधे पै तुहका डारि लेहे,
जैसे भोले बाबा डारे कीरा,
गमछा गमछा अब नहीं रहा,
हमरे खातिर आटै हीरा…
जब बनिके दुलहा हम बइठे,
तौ फिर से गमछा काम आय,
गठबंधन भा तोहरी किरपा,
रहि जातिन बिन बियहे भाय…
बंटी औ बबली पिक्चर मा,
अमिताभ बच्चन काँधे पै डाय लेहें,
कजरारे कजरारे नैना गाय लेहें,
औ आपन काम लहाय लेहें…
आज परी विपत्ति कोरोना की,
औ मास्कव हमरे ना जुहान,
फिर फिर से गमछा काम आय,
मुँह नाक बाँधिके फिर ठिकान…
केउ काँधे पै रामनामी गमछा,
केउ सतरंगिया लहकाये बा,
केउ राधे राधे वाला ओढे तौ,
केउ भगवा लहराये बा…
अंतिम यात्रा तक साथ दियय,
बन कफन साथ ई ना छोडय,
साथे साथे जलि जाय मगर,
खुद से ई साथ नहीं छोडय…
ई गमछा महिमा जे जानय,
ऊ एहका सबदिन सम्मान देय,
गमछा चैलेंज स्वीकार करय,
अच्छे अच्छन का टक्कर देय…
गमछा वाले राजू पांडे कै,
चैलेंज आज स्वीकार करा,
हमरे आगे सब जने फीका,
हमरै जय जयकार करा..
रचयिता
*राजू पाण्डेय बहेलियापुर*
